Астана - ел дамуының көрсеткіші

                                                 Астана-ел дамуының көрсеткіші

«Қазақстан Республикасындағы мемлекеттік мерекелер туралы» Қазақстан Республикасының Заңының 3-бабына сәйкес 6 шілде-«Астана күні» мемлекеттік мереке ретінде жыл сайын аталып өтіп келеді.  

Астана-қарқынды дамудың жарқын жолына түскен Жаңа Қазақстанның жасампаз бейнесі, мемлекет құраушы қазақ халқының төңірегі топтасқан жүзден астам өзге ұлт диаспораларының тағдыр сынынан өткен  шынайы һәм мызғымас достығы мен бірлігінің һәм тәуелсіздігіміздің үлпетті үлгісі және әлемдік халықаралық саясатта да  көшбасшылық танытқан басты қаламыз болып табылады.

Тәуелсіз қазақ мемлекетінің айтулы мерекесі қарсаңында «Жетісу облысының жұмыспен қамтуды үйлестіру және әлеуметтік бағдарламалар басқармасы» мемлекеттік мекемесінің «Мейірім» Жаркент арнаулы әлеуметтік қызмет көрсету орталығы» коммуналдық мемлекеттік мекемесінде де мерекелік шара жылдағы қалыптасқан дәстүр бойынша салтанатты жағдайда өтті.

Әсем безендірілген көрікті ауладағы іс-шараны жүргізуші мекеменің мәдени қызметкерлері оны ашық деп жариялаған соң Қазақстан Республикасының мемлекеттік Әнұраны салтанатты жағдайда орындалды. Мекеме директоры А. Раев мекеменің қызметкерлері мен қызмет алушыларын айтулы мерекемен құттықтап, қазақ мемлекетінің Астанасының елдің өркендеп дамуына, ішкі һәм сыртқы саясаттағы айшықты орын алып келе жатқан жасампаз жетістіктері мен халқымыздың нұрлы болашағына жол ашатын  өзіндік ұлттық мақтанышымыз, айбынымыз екенін айтып, барлық қатысушыларға өз жүрекжарды лебізін білдірді.

Мерекелік мәдени-концерттік бағдарламада есімдері ауданымызға белгілі өнерпаздардың, мекеменің мәдени қызметкерлерінің, сондай-ақ қызмет алушыларының қатысуларымен әсем әндер шырқалып, елордамыздың құрметіне арналған жырлар оқылды. Сондай-ақ  Амантай Әбдіқадырұлының төлтуындысы болып табылатын көркемдік деңгейі жоғары, сөзі мен әуені керемет үйлесім тапқан «Астана» әні көркемөнерпаздардың бірлесіп орындауында шырқалуының өзі тыңдармандарды бір серпілтіп тастады.

Барша қазақтың һәм қазақстандықтардың мақтанышы болып табылатын «Астана күні» мемлекеттік мерекесіне арналған аталған іс-шара ұлттық рухымызды көтерді десек болады.

Әлемдік сәулет өнерінің ерекше үлгісімен салынып, уақыт өткен сайын құлпырып келе жатқан Астанамыз еліміздің  дамуының айқын көрсеткіші екені сөзсіз шындық.

Бекмұхамет СӘЛІМҰЛЫ,

мекеме заңгері, журналист